Naggisch im Netz

Pfälzer Lyrik: Bernd Schwab (2025)
Original: ZZ Top - Sharp Dressed Man (1983)

Seit Johr, un Daach
Denk isch on Hecke in de Gaadeohlaach
Hees draus, hab Zeit
Do nutz isch die Gaadeuhoisischdischkeit

Mir hot's jo wirklisch faschd des Härn weggefetzt
jetzt bin isch tatsäschlisch do naggisch im Netz

Ä Loch in de Heck
Isch bin noch immer gonz starr vun dem Schreck
Doch moin Nochbar
der hot jetzt wirklisch dort ä Wildkamera

Mir hot's jo wirklisch faschd des Härn weggefetzt
jetzt bin isch tatsäschlisch do naggisch im Netz

Des Ding muss weg
Es zeigt halt ugewollt moin dabbische Speck
Unn lads hoch ind WW-Welt
Vielleischt hol isch mer doch besser ä Zelt

Mir hot's jo wirklisch faschd des Härn weggefetzt
jetzt bin isch tatsäschlisch do naggisch im Netz